ಅಣ್ಣೆ-ಮೆಗ್ಯೆ-ತಂಗಡಿ

ಪ್ರಕೃತಿದ ನಡುಟು ಬೇತೆ ಬೇತೆ ಪ್ರಾಣಿ ಪಕ್ಷಿಲೆನ ಸಂಬಂಧನೊಲೆನ ಸೃಶ್ಟಿಲೆನ್ ಮಲ್ತಿನ ಕಥೆಕ್ಕುಲು ನಮಡ ಸಾರ ಸಾರಲು ಉಲ್ಲ ಆನ್ಡ ಈ ಕಥೆ ನಿಕ್ಲೆಗ್ ಪೂರ ಗೊತ್ತುಂಡಾ ಅತ್ ಇಜ್ಜಾ ಪಂದ್ ಎಂಕ್ ಗೊತ್ತುಜಿ. ನಮ್ಮ ನೆಚ್ಚಿನ ಪ್ರಣಿಲೇ ಆಯಿನ 'ಪಿಲಿ,ಪುಚ್ಚೆ,ಬೊಕ್ಕ ನಾಯಿ'ದ ಅಜ್ಜಿಕಥೆ ಇಂಚ ಉಂಡು ಈ ಕಥೆಕ್ಕ್ ಏರಾಂಡಲಾ ಕವಿಕ್ಲ್ ಉಲ್ಲೆರ ಅತ್ ಇಜ್ಜೆರಾ ಪಂದ್ ಎಂಕ್ ಗೊತ್ತುಜಿ, ಇತ್ತ್ಂಡ್ ತೆರಿಪಾಲೆ ಪಂದ್ ಕೇನೋನುಬೆ. 'ಪಿಲಿ,ಪುಚ್ಚೆ,ಬೊಕ್ಕ ನಾಯಿ'ಲು ಮೂಜಿ ಜನಲಾ ಅಣ್ಣೆಮೆಗ್ಯನಕ್ಕ್ಲ್ ಆದಿತ್ತೆರ್. ಕಾಡೇ ಇಲ್ಲಾಯಿನ ಅಕ್ ಲ್ ಪ್ರಾಣಿಲೆನ್ ಪೂರಾ ಪತ್ತ್ ದ್ ಬೆಯ್ಪಾದ್ ತಿನೋಂದಿತ್ತೆರ್. ಒಂಜಿದಿನ ರಡ್ಡ್ ದಿನರ್ದಿಂಚಿ ತಿನರೆ ದಾಲ ಇಜ್ಜಾಂದಿನ ಮೊಕುಲು ಸುದೆ ಬರಿಯೆ ನೀರ್ ಪರ್ದಾಂಡಲಾ ಬದುಕ್ಕುಗಾ ಪನ್ದ್ ಸುದೆ ಬರಿಕ್ ಪೋಪೆರ್ ಅತನಗ ಅಕ್ಲೆಗ್ ಒಂಜಿ ಪೆತ್ತ ತೂವರ ತಿಕ್ಕುಂಡು ಐನ್ ತೂಯಿನ ಪಿಲಿ ಬೆಯ್ಪಾದ್ ತಿನರೆ ತಂಗಡಿ ಪುಚ್ಚೆಡ ಸು ಪತಬರ್ರಗ್ ಬೊಕ್ಕ ಮೆಗ್ಯೆ ನಾಯಿಡ ಬಿಸಲೆ ಕೊನೊದು ಬರ್ರಗ್ ಪನ್ಪೆ. ಅಣ್ಣನ ಪಾತೆರ ಮೀರಂದಿ ಮೊಕುಲು ಕಾಡ್ ರ್ದ್ ಊರುಗು ಜತ್ತ್ ಬರ್ಪೆರ್ ಆನಿ ಅಕ್ಲೆಗ್ ಓಲು ಪೋಂಡಲಾ 'ಸು'ಲಾ ತಿಕ್ಕುಜಿ ಬಿಸಲೆಲಾ ತಿಕ್ಕುಜಿ. ಉಂದೆರ್ದ್ ಬೇಜಾರಾಯಿನ ಮೊಕುಲು ಸೀದಾ ಅಣ್ಣೆ ಇತ್ತ್ ನಡೆ ಪೋಪೆರ್. ಕಾತ್ ಕಾತ್ ದ್ ಬಚ್ಚಿದ್ ಪೋಯಿನ ಅಣ್ಣೆ ಪಿಲಿ ಮೊಕುಲು ಬರ್ಪಿನ ತೋಜಂದೆ ಭಾರೀ ಕೋಪೊಡು ಇಪ್ಪುವೆ ಅತನಗ ನಾಯಿಲಾ ಪುಚ್ಚೆಲಾ ಬರ್ಪೆರ್. ಪಿಲಿ ಅಕ್ಲೆನ್ ವಿಚಾರಿಸನಗ ಎಂಕ್ಲೆಗ್ ದಾಲ ತಿಕ್ಕಿಜಣ್ಣಾ ಪಂದ್ ತಂಗಡಿ ಪುಚ್ಚೆ ಪನ್ಪಲ್, ಮೆಗ್ಯೆ ನಾಯಿಲಾ ಅಂಚೆನೇ ಪನ್ಪೆ. ಅತನಗ ಬಡವುದ ಕೋಪೊಡಿತ್ತಿನ ಪಿಲಿ ನಿಕ್ಲೆನ ಸುಲಾ ಬೊಡ್ಚಿ ಬಿಸಲೆಲಾ ಬೊಡ್ಚಿ ನಿಕ್ಲೆನೇ ಪತ್ ದ್ ತಿನ್ಪೆ ಪಂದ್ ಪೋಡಿಪ್ಪಾದ್ ಪತ್ತೆರೆ ಬರ್ಪೆ ಅತನಗ ಪುಚ್ಚೆ "ಎನನ್ ಪತ್ತುನ ಬುಡು ಎನ್ನ ಪೀ ನ್ಲಾ ನಿಕ್ಕ್ ತಿಕ್ಕರೆ ಬುಡಯೆ" ಪಂದ್ ಪಂಥ ಕಟ್ಟ್ ದ್ ನಾಯಿದೊಟ್ಟಿಗೆ ಊರುಗು ಪಾರ್ದ್ ಬರ್ಪುಂಡು.ಂಚೆನೇ ಗುರ್ತದ ಒಂಜಿ ಇಲ್ಲಡೆ ಬತ್ತಿನ ಮೊಕುಲು ಮೊಕುಲೆನ ಕತೆನ್ ಪನ್ಪೆರ್. ಐನ್ ಕೇನಿನ ಇಲ್ಲಾಲ್ದಕ್ಲ್ ಆಕಾರೊಡು ಎಲ್ಯ ಆಯಿನ ಪುಚ್ಚೆಗ್ ಇಲ್ಲ್ ಧುಲಾಯಿ ಭಾರೀ ಹಿಂಸೆ ಕೊರೊಂದಿತ್ತಿನ ಎಲಿಕ್ಲೆನ್ ಪತ್ತುನ ಬೇಲೆನ್, ಆಕಾರೊಡು ಮಲ್ಲಾಯಿನ ನಾಯಿಗ್ ಇಲ್ಲ್ ದ ಪಿದಯಿ ಇಲ್ಲ್ ಕಾಪುನಂಚಿನ ಕೆಲಸ ಕೊರ್ದು ತಾಂಕುಬೆರ್. ಬಡವುದ ಕೋಪೊಡು ಕೊದ್ಯೊಂದಿತ್ತಿನ ಪಿಲಿ ಒಯ್ಕ್ಲಾ ಪೋಡಿಪಂದೆ ಯಾನ್ ಈ ಪೆತ್ತನ್ ಪಜ್ಜಿಯೇ ತಿನ್ಪೆ "ಬಾಯಿಗ್ ಬೂರಿಂಡ ಬೆಯ್ತ್೦ಡ್, ತಿರ್ತ್ ಬೂರಿಂಡ ಪಜ್ಜಿ" ಪಂದ್ ಪೆತ್ತನ್ ಪತ್ತ್ ದ್ ರಾಪನಗ ಬಾಯಿಗ್ ಬೂರಿಂಡ್ ಅಯಿನ್ ತಿನ್ದ್ ಸುದೆಬರಿಕ್ಕ್ ಪೋದು ನೀರ್ ಪರ್ನಗ ಭಾರಿ ರುಚಿ ಆಂಡ್ಗೆ. ಐರ್ದ್ ಬೊಕ್ಕ ಪಿಲಿ ಪಜ್ಜಿಯೇ ತಿನರೆ ಸುರು ಮಲ್ತ್೦ಡ್ ಗೆ.